ప్రపంచ పర్యావరణ దినోత్సవ సందర్భంగా...కౌన్సిల్ ఫర్ గ్రీన్ రివొల్యూషన్" సంస్థ... వారు నిర్వహించిన పాటల పోటీలో ఎంపిక అయి పాటల సంకలన పుస్తకములో అచ్చయిన "గేయము".
మానవా మానవా అహంకారం మానవా
జీవులన్ని ఉంటేనే నీకు జీవితం వినవా
అన్నింటిని మింగేస్తే అన్ని నిన్ను మింగేస్తయ్
ఒక్కడివే ఉండాలంటే తొక్కిపాతరేసేస్తయ్
వాటి ఉసురు తగిలితే కాటికెళ్ళి పోతావూ
చెట్టులన్ని నరికేస్తే చేటు గలిగి చస్తావూ :మానవా:
జంతువులు పక్షులే దేవుళ్ళకు వాహనాలు
ఆకాశంలో చూస్తే అవేకదా రాశులు
పాలసముద్రమ్మునే పట్టి చిలికితేనూ
పుట్టిందీ ఏనుగూ గుర్రము చెట్టేనూ :మానవా:
దేవుడి అవతారాలైనా ముందు ఎలా పుట్టాడూ
చేపగ తాబేలులా వరాహమంటు నిలిచాడూ
తరువాతే భూమి నిలచి జీవమంత పుట్టింది
పాముగదా ఈ భూమిని పడగలపై పట్టింది :మానవా:
ప్రకృతినే ఎదిరిస్తే వికృతమై పోతావు
జీవులవైవిధ్యముంటె జీవిక సాగిస్తావు
ప్రాణులు నాశనమవక బాధ్యతగా జీవించు
ప్రేమ పంచు పోషించు జీవనమిక సాగించు :మానవా:
కామెంట్‌లు లేవు:
కామెంట్‌ను పోస్ట్ చేయండి