కవి'తల' అలలు
ఈ కవి తలలో పుట్టిన అలలు ఈ 'కవితల అలలు' .... ఇవి కవి'తల' అలలు.
31, ఆగస్టు 2018, శుక్రవారం
అదరక బెదరక
కుడికన్ను అదిరిందని ఖుషీఖుషీ అయిపోకు
ఎడమకన్ను అదిరిందని ఏడుస్తూకూర్చోకు
ఏది అదిరినా అదరక బెదరక
కుదురుగా ఉండేవాడే ధీరుడు.
29, ఆగస్టు 2018, బుధవారం
సెల్ఫీ సమాధి
తమను తాము "స్వయంగా" తెలుసుకుంటూ
జ్ఞానులు కొందరు "
సమాధిలోకి
"
తమను తాము "సెల్ఫీ" తీసుకుంటూ
అజ్ఞానులు కొందరు
"సమాధి"లోకి.
28, ఆగస్టు 2018, మంగళవారం
మోతగా
సంగీతం ఉండాలి
సాహిత్యానికి పల్లకీ
మోతగా
కాకూడదు మూతగా
డబ్బాలో గులకరాళ్ళ
మోతగా.
25, ఆగస్టు 2018, శనివారం
"చుక్క" లు
"చుక్క"కై దాహం
"చుక్కల"పై వ్యామోహం
ఆరోగ్యానికి పెట్టి "చుక్క"
ఆనక చూపిస్తాయి "చుక్కలు."
23, ఆగస్టు 2018, గురువారం
"ఛా" లెంజి
ఐస్ బకెట్ స్నానం
కీకీ నాట్యం "ఛా" లెంజిలు
రైస్ బకెట్ దానం
నల్గురికీ సాయం "ఛాలెంజ్" లు.
22, ఆగస్టు 2018, బుధవారం
"పై.డి"
"పైడి"
తో ఏదైనా విలువైనది
కొనుక్కోవచ్చునంటారు మా తెలుగుపంతులుగారు
"పై.డి"
తో ఏదైనా వృత్తంచుట్టుకొలత
కనుక్కోవచ్చునంటారు మా లెక్కల మాష్టారు
.
21, ఆగస్టు 2018, మంగళవారం
"షై"నికుడు
మనసారా ధైర్యంతో
ప్రాణాలను పణంగా పెడతాడు
దేశానికి బలం ఆ సైనికుడు
మన "సారా" ధైర్యంతో
ఆరోగ్యాన్ని పణంగా పెడతాడు
ప్రభుత్వానికి "బలం" ఈ "షై"నికుడు.
17, ఆగస్టు 2018, శుక్రవారం
తప్పు, కొనలేము.
ప్రేమను డబ్బుతో కొనగలమనుకుంటే
తప్పు, కొనలేము.
ప్రేమిస్తే మన బాధ్యతలనుండి
తప్పుకొనలేము.
16, ఆగస్టు 2018, గురువారం
నిశ్శబ్దంఫుల్లు
ఆ ఇల్లు ఒక పొదరిల్లు
ఏడుగురు సభ్యుల హరివిల్లు
చేతుల్లో తలాఒక సెల్లు
మాటలునిల్లు నిశ్శబ్దంఫుల్లు
15, ఆగస్టు 2018, బుధవారం
"మూడు" రంగులు
ధర్మచక్రం గలిగిన నిండైన
మన జెండాకు
మూడురంగులు
శత్రువుల పాలిటి
"మూడు" రంగులు
వచ్చారా "రంగు పడుద్ది."
14, ఆగస్టు 2018, మంగళవారం
"కక్కే" స్వేచ్ఛ
ప్రతివారికీ ఉంటుంది తమలోపల్ది
బయటకు "కక్కే" స్వేచ్ఛ
బయట వారు ఇబ్బంది
"పడకుండా" చూసే బాధ్యత లేదా, ఛాఛ!
11, ఆగస్టు 2018, శనివారం
విన్నవిం 'చేను'
వాడు చేయాల్సింది కన్యాదానం
హద్దు దాటి చేశాడు గర్భాధానం
కంచే మీదపడి మేస్తే, చేను
తనబాధ నెవరికి విన్నవించేను?
10, ఆగస్టు 2018, శుక్రవారం
సెల్లు పోటు
చేయి బుగ్గమీదుంటే "పన్నుపోటు"
చెవివద్ద ఉంటే "చెవిపోటు"
రెండింటికీ ఆనించి ఉంటే?
"సెల్లు పోటు"
8, ఆగస్టు 2018, బుధవారం
గుండె చెరువు
చెరువుల్లో నీళ్ళు నింపలేక
మేఘం "తెల్లమొగం" వేస్తే
రైతుకు "నల్లమొగం"
గుండె చెరువు, కళ్ళల్లో నీళ్ళు.
3, ఆగస్టు 2018, శుక్రవారం
గాలిపోలీసు
"నల్లధనం" దాచిన
"మబ్బు"గాళ్ళను
ఈడ్చికొట్టి "ఉరిమి","షాకిచ్చి"
కక్కిస్తున్నాడు "గాలిపోలీసు".
2, ఆగస్టు 2018, గురువారం
నరకం
పచ్చదనం లేకుంటే
నరలోకం
నరకం
ఇది తెలిస్తే చెట్లను
ఇష్టం వచ్చినట్లు
నరకం.
కొత్త పోస్ట్లు
పాత పోస్ట్లు
హోమ్
దీనికి సబ్స్క్రయిబ్ చేయి:
పోస్ట్లు (Atom)